一九九九年年尾一場英超，利物浦對錫周三，十九歲嘅謝拉特喺比賽六十九分鐘，個人solo射入咗佢喺紅軍嘅第一球，協助球隊大勝4:1。但呢場波最搶鏡嘅唔係佢，亦唔係奧雲仔，而係第一個衝埋去恭喜謝拉特入波嘅大衛湯臣。佢喺呢場波入咗一球兼製造咗另外兩個入波嘅機會，光芒四射。當時要球迷投票估邊位青訓係利記未來之星的話，大衛湯臣應該會多票過謝拉特。可惜喺十六年後，傳媒問已經退休嘅大衛湯臣，邊場係佢生涯代表作，答案竟然仲係嗰場。
那些年的利物浦中場，其實冇乜空間畀新人上位，多得列納周不時受傷，先至漏咗啲機會出嚟畀新人攝位。原本大謝拉特兩年嘅大衛湯臣排隊頭，但謝拉特又好得侯利亞賞識喎，惟有爭食啦；開頭都可以叫做良性競爭，但細細粒嘅大衛湯臣成日要擺喺右中場，原來呢個位佢一啲都唔enjoy，終於頂唔住半紅不黑嘅狀態，走人。
之後謝拉特大無畏扶搖直上，大衛湯臣不得志每下愈況，兩人嘅足球生涯已經再冇得比，亦再無轇轕。謝拉特之後十幾年嘅故事人人都知，大衛湯臣就輾轉去過幾間中游以及英冠分子，喺幾年前因為傷患退休。
「我好欣賞謝拉特，但亦好憎佢！」喺年半前一個訪問之中，大衛湯臣就講出咗佢咁多年嘅心結，「當年我等咗兩年先有機會上到一隊，咁啱就有呢個𡃁仔殺出嚟同我爭位，我都知佢係好特別嘅球員，好有class，但佢亦逼到我要踢右邊。我當時心諗，謝拉特嘅出現，可能就係我嘅終結。」講到打咩位，多年來謝拉特又真係好似冇乜發過牢騷；可以做萬能角色，其實未必在於能力，而係心態話事。
今晚場紀念賽，星光當然熠熠，好多謝拉特曾經合作過嘅星級拍檔都榜上有名。大衛湯臣呢？一如所料係冇份啦，應該冇乜機會好頭好尾攞到個最後的擁抱。但佢話過離開利物浦之後一直有睇番球隊啲波，應該唔會錯過欣賞呢場比賽。
當大衛湯臣再次見到謝拉特成為球場焦點嘅時候，希望佢唔再係心有不忿，而係戥謝拉特高興。人生入面少一件自己介意嘅無謂憾事，而多一個阿仔都崇拜嘅曾經戰友，笑容應該會多番啲。
畢竟如果要鬥多球場憾事，謝拉特分分鐘仲多啲。
KEYMAN
節目主持