體壇拾趣:黑帝無懼壞車快絕大馬

體壇拾趣:
黑帝無懼壞車快絕大馬

今屆F1聽日喺馬來西亞進行第二站賽事,效力平治車隊嘅黑帝咸姆頓嚟到自己福地份外醒神,噚日雖然因引擎問題玩唔到第一節練習賽,但係喺第二節即刻騷哥利,以1分39秒790成為最快嘅車手。(now672台4:30pm起直播排位賽)
喺噚日嘅練習賽,咸姆頓因為架車嘅引擎發生問題而錯過咗第一節,但冇影響到第二節嘅表現,仲以1分39秒790造出最快圈速,比第二位嘅法拉利車手拉高倫快0.373秒;而佢隊友羅斯保就得第三,時間係1分40秒218。兩個禮拜前喺澳洲站攞冠軍嘅咸姆頓,原來喺大馬嘅成績好彪炳,自二○○七年參賽至今未試過喺呢度攞唔到分,最差嗰年係二○一一年得第八名,有四次入三甲,包括喺上年贏咗冠軍。另外,咸姆頓原本設計咗個新頭盔玩大馬站,但因賽會有新例唔畀車手轉款,所以聽日唔可以戴。
至於喺季前試車炒車撞親頭而缺席澳洲站嘅麥拿侖車手艾朗素,就可以玩大馬站,但噚日喺練習賽就表現麻麻,第一節以1分42秒885排第十四,第二節雖然快咗啲,不過只係造出1分42秒506,比咸姆頓慢2.716秒。