若果話出碟要夾timing，有乜嘢夾得過《翻生侏羅館3》排喺復活節推出？幾日都等唔到，全因得利發行嘅勁片排住隊嚟。如無意外今日《飛鳥俠》已經派街，下周仲有《星際啟示錄》，下下周有《多啦A夢》，為免自己人打自己人，呢個佈陣都算合理嘅。《翻生侏羅館3》唔好睇咩？拍到第三集好難有乜新創意，笑料唔夠亦係事實，不過睇班友仔踩場去大英博物館，天花龍鳳嘅特技，仲要係笑匠羅賓威廉士嘅遺作，單單呢幾點已經值得捧場。
上年聖誕，龍叔叔第一次幫襯朗豪坊4DX戲院，就係睇《翻生侏羅館3》，$168一張飛係幾貴，不過張凳識郁又吹風又噴水，龍嬸嬸不知睇得幾high，成為聖誕最難忘節目。今次喺屋企睇BD版，雖然無咗嗰種體感刺激，不過CG特技同音效等視聽震撼仍在。今集扭橋扭到去大英博物館，博物館收藏嘅歷史文物多不勝數，你可以想像到全部翻生之後，會有幾過癮。好似俾巨形三角龍化石狂追、智取中國九頭蛇、走入充滿視覺矛盾嘅畫作等等，好幾幕都睇得相當開心。
Bonus豐富到爆
一班演員雖然好賣力演出，不過似是夕陽黃花，衝擊唔到乜嘢新點子出嚟，連羅賓威廉士嘅演出都只係不過不失，冇乜嘢位可以發揮。主角賓史迪拿更難堪，雖然一人分飾兩角，扮埋古代野人LaLa一齊歷險，不覺硬係欠缺咗頭兩集嘅演出神采，就好似《非常外父3》咁，唔好笑兼感染力低，以乎賓史迪拿唔係好適合拍三部曲系列。
港版BD幾有誠意，除咗有DTS-HD MA 7.1靚聲效外，bonus內容都好豐富，由making of、演員訪問、刪除片段、特技解構等，足足有十個item，難怪要用BD50格式去錄製。最正係全部bonus配晒中文字幕，不知不覺可以hea多成粒鐘。要彈嘅係呢類賣弄視覺特技嘅片，居然無3D，雖然有點可惜，不過作為周末喺屋企消閒，算係幾稱職嘅合家歡電影。
若然有第四集，龍叔叔希望轉場去中國，睇故宮博物院嘅歷史文物翻生，想像到會郁嘅《清明上河圖》，同埋寧壽宮九龍壁，九條龍飛嚟飛去，應該幾有睇頭。再唔係嚟香港，雖然冇乜嘢世界聞名嘅博物館，不過可以轉玩蠟像館吖，起碼多一個巨肺GEM，一個講國語一個講廣東話，nicam演出幾過癮呀！
Profile：龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie）
