全球轉會身價最高嘅加里夫巴利（圖），近期喺西甲慘成受靶對象；趁國際賽小休避吓風頭，今晚同國家隊好拍檔艾朗藍斯，聯手帶領威爾斯，喺歐國外作客以色列，威力勢復現。威軍受讓高水，當取下盤。
值一億歐元嘅巴利背負全球最貴身價，不過皇馬大佬始終仲係基斯坦奴朗拿度（C朗）。睇番呢位威爾斯猛將，上季為皇馬上陣四十四場入二十二球，今季暫時三十九場入十六球，保持高入球率；皇馬表現大走樣，剛戰敗走國家打吡後，受球迷襲擊嘅巴利，更不獲傳媒評分。但究竟係巴利獨食，定係情變嘅C朗狀態下滑，看官自有定奪。從兩人近期喺場內貌合神離，不和不無原因；不過，C朗行年三十，巴利僅二十五歲，後者要獨當一面，來日方長。
拍住藍斯攻力勁
返到威爾斯，與巴利級數最接近嘅阿仙奴中場艾朗藍斯，踢法、性格從來低調，兩人「一中一前」更無衝突。威爾斯得呢兩位國家隊現役頭、二號射手壓陣，連同正選陣容參半屬英超常規正選，喺今季歐國外B組首四場取得兩勝兩和，只失兩球。踢足四場嘅巴利，助攻、入球俱備外，喺上仗球隊爆大冷和歐洲一線隊比利時0:0，不但兩度主射罰球，威脅到對手鋼門泰拔高圖爾斯，完場前更門前救出危球，盡顯大哥風範。今場威軍兵源充足，連三號射手禾基斯亦可久休復出國家隊，作客同級嘅以色列，巴利得到掩護，最好獨食多啲。
以色列陣中最出名係踢過英超、現效力英冠查爾頓嘅隊長兼中堅賓希姆；今場被熱捧，可能因上仗竟能主場三球大炒世界盃決賽周隊伍波斯尼亞。但球迷宜留意，波軍上仗前線兩把尖刀迪斯高及伊比斯域俱缺陣，加上下半場初段已少踢一人，以色列大勝有疑點，呢類歐洲三線隊不值被捧熱。
另外兩選，波膽博外圍賽四戰全勝嘅捷克，主場大炒拉脫維亞；至於另一「讓球」下盤，另類啲揀周日早上嘅美職。FC達拉斯前線缺少要踢國際賽嘅巴拿馬射手巴拉斯佩雷斯，就難讓得起另一西岸強豪、擁馬田斯呢把尖刀嘅西雅圖海灣者。
波神
神級攻略 智破足彩