呢幾日繼續踢國際賽，你哋唔悶，我求大俠都悶啦，如果想睇番啲那些年嘅球星，好似亨利、基維爾等等（見附表），又想做善事，聽日英國時間下午三點（香港時間晚上十點）開波嘅謝拉特及加歷查慈善賽，就一定唔可以錯過喇！
高治冇份踢唔開心
神奇隊長謝拉特下季就轉投洛杉磯銀河，所以喺晏菲路比賽真係睇一場少一場；聽日紅軍安排謝拉特同加歷查兩位忠臣，各自領軍出戰慈善賽，其實大家焦點都落喺呢位大隊長度；加歷查都好識做，點兵方面都讓晒謝四，所以謝拉特隊就擁有蘇亞雷斯、亨利、費蘭度托利斯等頂級射手，佢哋助攻畀謝四又好，謝四助攻番畀佢哋都好，總之多波入球迷就收貨。
臨近比賽日，亦都陸續增加出席球星，好似澳洲球星基維爾就會去加歷查隊，謝四隊都有查理阿當、艾殊利威廉斯等新兵，較特別係謝四堂細佬、奧咸後衞安東尼謝拉特都會幫手㖭。不過已轉投土超費倫巴治嘅前鋒古積特同中場魯爾梅利斯，就因為有傷唔會落場，但佢哋都好有心，照樣出席賽前活動，真係畀足面利物浦。正所謂順得哥情失嫂意，長人中鋒高治都叫幫紅軍立過唔少汗馬功勞，但係今次就未獲邀請，佢仲喺twitter找加歷查晦氣，有球迷就叫高治衝入球場示威，一於搞寸個party啦。
上網登記十二蚊有得睇
利物浦都好照顧冇辦法親臨晏菲路嘅球迷，所以特別開放紅軍官方電視台《LFCTV》，只要捐出一鎊（約11.6港元），就可獲星期日二十四小時通行證，睇《LFCTV》節目，當然包括呢場慈善賽嘅直播，收入亦都會撥捐利物浦慈善基金。有心捐錢睇直播嘅球迷，今日就可以登入下列網址登記嘞： http://www.liverpoolfc.com/corporate/liverpool-all-star-charity-match/lfctv-lfctv-go
識睇，一定係睇足英台【英波Live】：
http://soccer.appledaily.com
http://bit.ly/engballlive