疑受政府打壓嘅內房股佳兆業（1638），短短兩個幾月就因為被封盤而走上清盤之路，示範咗民企可以點樣閃電爆煲，咪話唔得人驚。不過中渝置地（1224）副主席兼董事總經理林孝文醫生就定過抬油，被傳媒問內房股係咪面對好大政治風險時，佢爽快答：「零！」
在場記者見佢答得咁爽，以為佢講大咗，未等記者追問，林醫生再重複一次：「我哋政治風險係零！你哋可以quote我」。都話政治打壓喎，又點話得埋，早前除咗佳兆業爆煲之外，同一時間仲有雅居樂（3383）主席陳卓林突然被「監視居住」。林醫生仍然好氣定神閒咁答：「我哋買地依足晒規矩，好小心謹慎，做我哋股東，夜晚安心瞓得着」。
政治嘅嘢變化萬千，中渝主席兼大股東張松橋係「重慶李嘉誠」。習近平上台後就將重慶前市委書記薄熙來拉落台。林醫生咁肯定冇事，唔通已經傾掂數？