星期三晚發生咗件轟動網絡嘅事，阿仙奴棄將「中堅賓」賓特拿竟然大演帽子戲法，幫丹麥以3:2擊敗美國！賽後各種改圖、抽水留言真係好似潮水咁喺各個社交平台湧現，話賓特拿勁過C朗、搞到奧巴馬喊，真係誇到我求大俠都O晒嘴！
夏文抽水：以為飲大咗
出道以來，賓特拿就係球壇嘅網絡紅人，因為佢場外場內嘅事迹實在太驚人，最經典莫過於喺阿仙奴嗰陣擋番隊友嘅射波出嚟，俾人改咗個花名叫中堅賓。雖然踢波唔係好勁，但超有自信，話皇馬同巴塞應該收購佢，所以佢亦有花名叫「自信帝」，至於外國網民就叫佢做「Lord」！講番場波先，中堅賓就係代表丹麥正選出場，已經引嚟網民哄動。雖然丹麥先失波，但賓特拿半場追平。換邊後，丹麥又再落後，但賓特拿發威，尾段再入多兩球，幫國家隊以3:2反勝美國。
佢今季喺禾夫斯堡坐冷板多，呢場大演帽子戲法真係吐氣揚眉！網民亦冇錯過呢個千載難逢嘅抽水良機，唔少人都搵C朗嚟同賓特拿比較，話C朗今年都未試過帽子戲法，但中堅賓試過；C朗同美斯今年未入過美國隊波，但賓特拿入到三球咁多，真係勁過球王咁話喎！仲有張改圖話美國總統奧巴馬見到中堅賓都驚到喊，就連前德國國腳夏文都湊熱鬧，喺星期四朝早抽埋一份，「我諗我噚晚肯定飲大咗，一起身竟然見到賓特拿入三球！快啲搵人拍醒我！」
普多尾段發威逼和澳洲
阿仙奴棄將特別多，星期三入波嘅都唔只賓特拿一個，一月俾阿仙奴借咗去國際米蘭嘅普多斯基都有「士哥」，幫世界冠軍德國爭番少少面子。德國喺周三主場對澳洲，雖然靠馬高列奧斯開紀錄，但之後輸番兩球，好在普多喺八十一分鐘追成2:2完場。另外，德國中場基迪拉首次承認，唔會同皇馬續約，季尾離隊。
