一連四集《少女摸摸茶》找來幾位潮爆網絡界的少女作嘉賓，與動主播汶汶「摸」着茶杯底，盡吐心中所想，展示網絡下的神秘一面！
記者：方榆汶 攝影：廖達燊 馮嘉文
不甘做港女 辭職闖蕩世界
今集請來80後追夢少女小雲（鄧曦珩）作嘉賓，小雲與旅遊伙伴周雅霏由計劃、找贊助至出發，前後只花了一個月時間。旅程亦被紀錄成《霏雲闖蕩》在網上熱播，到底甚麼原因令她們如此大幹勁，甚至毅然辭去正職呢？小雲回答兩個字「追夢」。「我同雅霏想話畀大家知，好多人用港女形容香港女仔，唔捱得，淨係識買名牌，但其實唔係！」小雲與雅霏專挑一些平常人較少遊歷的地方作目的地，過程毫不車華，瞓街、選擇搭十多小時的巴士作交通，務求用最低成本遊歷整個世界。兩人海外回流，飽讀師書，家人對於「追夢」當然有意見，不過任性亦換來意外收穫，「一開始係打算雅霏寫字，我影相去出本書，之後朋友問起點解唔拍片呢？嗰一刻覺得之後睇番應該幾有趣，所以就用咗一個旅遊特輯嘅形式去拍，然後好幸運地有人賞識，買咗去播。」有時任性的本錢，就是年輕。
夢幻土耳其 風情人品好
眼前盡是白茫茫一遍，坐在要穿Bikini才夠涼快的「雪山」上，全身塗上海底泥，慢慢欣賞火山爆發而成的這座棉花堡，相信在場只得四處闖蕩的小雲感受過，「土耳其棉花堡基本上係我夢想嘅地方，唔止係風景，土耳其人都十分好，因為好多地方都可能會有歧視中國人，你係遊客就對你特別唔好，但反而因為我哋係遊客，我哋去到邊都好受歡迎！」從小雲口中能理解，土耳其最美麗的不單止風景，而是旅途上遇到的人和事。
女生．獨遊
兩個青春少艾去旅遊，自然令人感到危險！問到小雲有否遇過恐怖事，她就立即手舞足蹈地分享與雅霏被小偷狂追的事發經過，「我哋試過喺意大利自己搭地下鐵，上車時已經有好多人跟住，到落車我哋行快啲，佢就追上嚟，我哋驚到大叫！最後跑到賣票個阿叔度叫救命，個人先冇跟上嚟！」如今看見小雲安然無恙，真替她抹一把汗。
熱可樂 顛倒外內
汽水凍飲佳，但無益。可樂一樣，凍飲刺激涼快，但可樂煲薑就據說有醫療作用。「有好多事唔可以只睇外表，有啲人認為我係好wild好癲嘅人，但只要你花少少時間認識我，就會發現我同熱可樂一樣，係好暖身，好窩心嘅朋友。」凡事只看外表，往往會使自己錯過精采的一面。
鄧曦珩（小雲）
生日：1989年10月16日（25歲）
出道年資：1年
作品：《霏雲闖蕩》- 尼泊爾篇
《霏雲闖蕩》- 南美篇
《霏雲闖蕩》-馬來西亞篇
《霏雲闖蕩》-南歐篇
著作：《霏雲闖蕩》
鳴謝
場地提供：牧羊少年咖啡．茶．酒館