有雞先定蛋先，呢個問題都煩咗我哋上千年，其實世界上好多現象都係咁，兩個現象好似有因果關係，但分唔到邊個係因，邊個係果。英格蘭球員質素唔掂，同埋英超球會唔用英格蘭人，聽落去前者係因，後者係果。不過，件事又可以掉轉嚟睇，好似好多球圈人仕話齋，係英超球會唔用英格蘭人，先至搞到啲球員冇進步。
英足總前幾日公佈咗新措施，強制增加球隊本土青訓球員數目，同埋收緊對非歐盟球員工作證嘅申請，提升英格蘭球員喺聯賽嘅比例。足總嘅諗法好簡單，當基數大咗，好球員自然會多咗啦，國家隊就會勁啲。不過，呢種做法係賭聯賽質素下降完之後會升。
強制增加本土青訓球員比例，同時本土球員實力比唔上外援，車路士、曼城呢啲外援主導嘅球隊自然實力下降，連累歐洲賽成績退步，英超可能會被德甲等超越，歐聯資格跌到得三個。同埋，物以罕為貴，喺短期內，英格蘭好球員嘅身價會再創新高。
政策生效後五年係好關鍵，我哋將會知道有雞先定蛋先嘅答案。如果上陣多咗真係令英格蘭球員整體質素上升，咁英超同國家隊都會一齊受益。相反，如果英格蘭球員能力出問題嘅核心係青訓系統落後或者其他因素，新政只係揠苗助長，咁英超將面對險境。聯賽質素下降，轉播收益減少，但球隊齊齊大灑金錢買英人，結果成個聯賽會逐漸陷入財困。
文：咖喱