【鳩嗚乜乜乜】
4月4日星期六，大家又有機會觀賞到月全食（圖），天文台噚日公佈當日天氣預測，當日天公造美、天氣唔錯，部份時間有陽光，或者可以賞個靚月。大家會睇唔到月食完整過程，因為月全食喺當日下午5點正開始，但係要到6點33分先月出，已經完成「半影食始」和「初虧」兩個步驟。
#下次要等三年
唔緊要，仲可以睇到餘下過程，月出後約1小時20分鐘、即晚上8點正，會進入月亮最暗嘅「食甚」；6分鐘後就「生光」，即係月亮再次發亮；直至9點45分「復圓」之後再「半影食終」，整個月食過程歷時4小時28分鐘。
咁去邊度睇好？天文台話，喺睇到東或東南方地平線嘅地方，如石澳、大帽山山頂等。天文台當晚6點45分仲會喺尖沙嘴星光大道畀市民用天文望遠鏡觀賞月全食。下次月食係9月28日，但到時香港無緣觀賞到，如要再次睇到完整月全食，就要等到2018年1月31日喇。
係咪唔慣費清咁學術，不如講少少無聊嘢。成日聽人講天狗食月，但根據詩仙李白係古詩〈古朗月行〉話，係蟾蜍食月㗎！仲食到「大明夜已殘」，天狗真係慘慘豬（不過天狗食日，查實同蟾蜍一擔擔，都唔係好人）。
費清 ＃要生計，也要生活 ＃毋忘初衷