噚日公佈嘅一項調查話喎，香港打工仔覺得最具吸引力嘅香港僱主係國泰航空（CX），八方即刻聯想到，紅衣國泰空姐微笑揮手，確令人好有遐想好想加入；但當第二位係海洋公園，空姐個樣突然間卻變咗前主席盛智文，發緊白日夢都嚇醒！而呢個Randstad Award 2015嘅結果，第三位係中電。銀行業方面最具吸引力嘅係匯豐；科技界就係IBM。
結果同早前一個顧員服務顧問公司委託大學做嘅研究有啲出入喎，事關嗰個研究話打工仔覺得最勁嘅五大公司依次係香港政府、蘋果公司、谷歌、長和同匯豐。但兩個研究都話，年輕僱員好着緊工作生活平衡。Randstad Award訪問咗7,754名香港僱員，發現25歲以下嘅員工有29%會因為缺乏生活平衡而離職，比其他年齡組別嘅高。
研究又話有24%僱員打算喺一年內辭工，理由包括待遇欠佳（38%）、事業發展機會有限（28%）和缺乏工作上的認同（26%）。