香港度度都係摩天大廈，吸引唔少攀爬摩廈嘅發燒友一展抱負。曾經兩次來港攀爬摩廈嘅18歲德國男子Andrej Ciesielski，最新征服嘅係700呎高嘅銅鑼灣利園宏利保險大廈，Andrej接受New York Daily News訪問時話，其實佢完全冇做任何安全措施，因為咁樣爬法，興奮好多。八方提醒各位市民切勿模仿，人家好似蜘蛛俠咁天賦異稟呀。
驚警察多過怕高
追求腎上腺素飆升嘅Andrej，兩年前愛上攀爬高樓大廈，記者問佢驚唔驚？佢話自己怕警察、保安多過怕高，如果有條安全帶喺身，就會好冇癮。Andrej將佢攀爬利園宏利保險大廈嘅過程拍咗條片，共諸同好，佢將鏡頭綁上額頭，然後一步一步攀上天台嘅鐵欄，其間佢仲不時攞部單反、手機出嚟影相，幾百呎高空上，佢一手捉住鐵枝，一手影相，睇到都覺得牙煙，難以想像佢點解可以咁鎮定。
但攀爬摩廈唔係次次都咁成功㗎。Andrej話佢今年2月來港入住麗景酒店，當然要喺主場攀爬吓，但驚動到酒店保安，搞到保安報警兼帶埋佢返差館。警方話如果佢再犯，會禁止佢入境香港，佢仲試過遭警方刪走600幾張相喎。之不過，又唔係個個保安都咁唔識趣，試過有保安發現佢闖上天台後，同佢齊齊欣賞居高臨下嘅美景。Andrej已經到咗上海，唔知佢又有乜嘢目標？
李八方
mailto:[email protected]