專責政改嘅政務司司長林鄭月娥，噚日忙裏偷閒相約傳媒喺官邸茶敍鬆一鬆。佢透露平日只要唔落雨，都會去泳池邊做運動，最常玩嘅係跳繩。問佢平日有冇喺個泳池暢泳？林鄭就只係話「有人用過」，保持大家對佢着泳衣嘅神秘感。
同記者開餐時，林鄭全程都只係夾少少嘢食，佢話由於家族有糖尿病歷史，所以一向食得清淡，現時血糖水平正常，身體尚算健康。雖然唔少女士怕上磅，但林鄭就自爆經常用電子磅量住體重，BMI肯定低於水平。佢近排睇番做發展局局長時嘅相片，更自覺身形細咗一個碼，但覺得隨住即將60歲「登六」，希望可以肥番少少，「多番少少脂肪係好事」。
問到老公對佢體重有冇意見，林鄭笑言：「佢唔係心痛我瘦，係心痛我成日咁煩惱。」講起住山頂嘅交通問題時，林鄭話佔中期間試過因為塞車，原本由政總返屋企只需十分鐘嘅路程，拖逾一小時至返到office。