【維基解密之滄海遺珠】梁小冰和周家怡在港視劇《導火新聞線》率先彈出，戲裏戲外與家怡情同姊妹的楊淇可算是滄海遺珠。入行已經15年的楊淇在演藝圈載浮載沉，08年因媽媽離世，令她大受打擊患上抑鬱症，好不容易才走出陰霾。楊淇自言「阿咩」是自己寫照，做事不怕艱辛、充滿理想，她戲言：「做呢行，如果唔夠熱血唔可能做落去。」
撰文：嵐山
現年30歲的楊淇望落依然嫩口，在《導火新聞線》中飾演年紀最輕、初出茅廬，而且天不怕地不怕的記者新丁「阿咩」。楊淇日前在尖沙嘴受訪，直言今次角色是入行以來最似自己的一個，她說：「第一日見編審（潘漫紅）佢就問我知唔知乜嘢叫九型人格，佢叫我做七號仔，臨走加多句：『好似你𠵱家咁』，我就放心晒，以我性格做藍本。所以演出時感受特別深，好似帶住楊淇去經歷一件事。」
唔夠熱血做唔到
楊淇於2000年被夏永康發掘做廣告新星，之後得張艾嘉提攜躍登大銀幕，02年憑電影《魂魄唔齊》獲金像獎最佳新人獎提名，04年再憑電影《20 30 40》分別獲金像獎及金馬獎最佳女配角提名，可惜事業非平步青雲。在《導》劇中阿咩表面開朗，暗藏一段童年遭家暴的悲慘往事，獨自去流浪一段日子；現實中的楊淇也曾因媽媽離世大受打擊，因情緒問題去了台灣靜養，她說：「09年同張姐（張艾嘉）約滿，其實之前一年經歷好多。08年媽咪過身，對我嚟講打擊非常之大，過去台灣話就話發展，其實係想靜思一下。」是否曾患抑鬱？她說：「有啲抑鬱㗎，食藥？唔講呢啲嘞，都過咗。」
後來楊爸爸因工受傷，楊淇要返港照顧他，其間王維基開台招攬大量演員和幕後，讓她過去兩年一劇接一劇；但港視開劇無期，楊淇依然抱樂觀態度，笑說：「雖然無奈，但冇嘢一定成功，唔再試又點知唔得呢？其實做呢行，如果唔夠熱血唔可能做落去，千祈唔好為一件事影響自己，唔樂觀我就bye走咗嘞。」
提起床戲臉紅紅
楊淇希望得到觀眾認同，所以每次演出會花盡心機；尤其在《導》劇更加搏到盡，獻出最大膽一次，與男神王宗堯在今日播出的第14集有一場激烈床戲，楊淇提起都面紅耳赤，她說：「我哋雨中咀完仲有下文，喺屋入面我除剩個bra，仲要單手除佢褲鈕，但我除極都除唔到。宗堯反問我『點解除唔到？』仲示範一次，我講都驚呀，當時只識哈哈笑，問可唔可以畀番啲衫我着呀？」
場地：海景嘉福洲際酒店
服裝：iBLUES
化妝：Judy Cheung
髮型：Deep Yu of Beijing Hair Culture
郭鋒唔做厚多士
郭鋒在70年出道，老戲骨演甚麼角色都手到拿來，在港視一口氣拍了8部劇集，《導》劇中飾演一名膽怯怕事、息事寧人的社長「關公」，郭鋒說：「演呢個角色都好有佈局，因為佢埋藏喺心裏面其實好驚俾人蝦，一個保守派，好寫實。」郭鋒認為關公這人物可以存在於不同界別，但在演藝圈多年，郭鋒不會做「厚多士」，他笑說：「我哋初出道嗰時，啲前輩會當面教你同鬧你，但𠵱家嗰啲唔鬧得嘛，有啲後生會尊重你，但有啲會冷眼睇你，當正自己係阿姐阿哥。」
郭鋒雖說不敢亂教人，但對住一些肯學肯捱的後輩仍熱心提點。楊淇便爆「師母」郭鋒會偷偷教自己做戲，郭鋒解釋：「呢個女仔好聽話，因為佢跟我太太（歐陽珮珊）學氣功，所以平日叫我做「師母」，有啲角度、表情可以做好啲，會提點吓。」
郭鋒與港視還有一年合約，對於港視不獲發牌，郭鋒反而戥一班後生擔心，他說：「好無奈㗎，後生真係飛唔出。其實香港真係好畸形，外國有工會，藝人可以去邊個台都得，咁叫公平競爭，但香港就做唔到，可能港人私心太重。」
