【U23亞錦外分組賽（F組）】
大、小港腳今個禮拜分途出擊，大港腳聽日喺旺角場友賽關島，小港腳今日就喺高雄出戰U23亞錦外分組賽，搞到主教練金判坤（阿Kim）要港、台兩邊飛，名副其實飛鑊「金」！
小港腳練定死球撼澳洲
今個禮拜係七欖周，但港足都唔輸蝕，大小港腳分途出擊。足總更特別搵嚟Cindy、Joey同Veronica三位靚女「模刁」化身港足Angels，聽日入旺角場同球迷影相造勢，擺明硬撼七欖。噚日喺晒草灣晨操嘅大港腳，效力中超石家莊永昌嘅白鶴終於歸隊，首次人齊練波當然冇令阿Kim失望，佢仲點名大讚澳滌小將李嘉耀，好似曼聯嘅費蘭尼一樣能攻擅守，睇好佢做新一代「十號仔」。帶完大港腳後，阿Kim傍晚就飛去寶島同小港腳會合。
今屆U23亞錦外四十三支參賽球隊分成十組，每組首名同五支最佳次名，晉級下年喺卡塔爾舉行嘅決賽周。被編入F組嘅小港腳，今日四點就會喺高雄國家體育場對澳洲，中場顏樂楓話︰「雖然Kim sir未嚟到督操，但我哋都有練定死球同反擊，有信心贏波爭出線。」阿Kim今日帶完小港腳後，聽日一早就會趕返香港帶大港腳大戰關島，之後又再飛去台灣，帶小港腳踢緬甸同中華台北兩場分組賽。