【中環】
今年32歲嘅混血女模顏穎思（Rachel），近年已淡出娛樂圈，之後曾經同珠寶店太子爺楊承宇拍拖，但最終分手收場，直到上年5月，Rachel喺微博上載多張步入教堂嘅相片，宣佈同教友Matthew Chung結婚，當日老友吳辰君仲即刻留言恭賀佢，又讚佢係最美麗新娘，原來Rachel好快會做埋最美麗媽咪㖭！真係恭喜晒！
前日大約三點，個肚脹卜卜，大約有六個月身孕嘅Rachel，素顏現身中環，着平底鞋嘅佢全程慢慢行，經過梯級尤其小心，而且成日都用手摸住肚皮。不過，除咗腹部脹起，Rachel仍然臉尖尖，手腳亦好纖幼，驟眼望完全唔似大肚婆。
朋友全程齋聽
原來Rachel當日約咗一位女友人喺ifc飲下午茶，全程講不停嘅佢不停指手劃腳，朋友完全係佢嘅聆聽者，而Rachel一講就講咗兩個鐘，之後佢同女友人道別，然後一個人行咗去附近一座商業大廈。
採訪、攝影：羅德光
