利標（787）與「萬人迷」碧咸合作成立嘅合營公司，噚日首次披露詳情。同碧咸老友鬼鬼嘅利標行政總裁樂裕民指，新公司名為「Seven Global」（未有官方中文譯名，姑且叫住「柒球」先），代表碧咸球衣號碼7號，同埋業務放眼全球七大州；佢仲好雄心咁話，目標係喺五年內將柒球嘅營業額提升至10億美元（約78億港元）以上。
柒球將與碧咸喺五個範疇合作，推出佢做代言人嘅產品，包括運動用品、服飾、個人護理產品、健康產品同生活優閒產品；樂裕民話碧咸喺內地擁有大量球迷，中國將成為合資公司其中一個最重要市場，仲透露未來幾個月，將會有關於碧咸品牌嘅新產品重大公佈呢。