偉大嘅特首同前前特首，眼見咁多後生仔上街，唔係佔中就反水貨客，就一廂情願以為香港年輕人撈唔起，就叫佢哋北上搵機遇，唔通離鄉別井先至有出路？
英足總似乎仲嫌對英格蘭兵嘅保護仲唔夠，又話要立新例，包括限制非歐盟球員加盟英超球會，不過英格蘭兵喺英超待遇真係咁慘咩？史達寧喺利物浦踢咗一季幾好波，周薪已經加完，𠵱家又話傾新約，十萬鎊周薪都嫌唔夠喉，仲有傳媒捧到拜仁慕尼黑想買佢，小弟唔怕得罪利物浦球迷都要講句，史達寧去到拜仁，執波都冇資格啦，隨時紐亞都好波過佢。唔好提朗尼呢啲超級頂薪，就算禾確特、安祖斯唐辛之流，掹車邊英格蘭國腳，周薪都幾萬鎊起標。
新一輪國際賽名單，世界盃冠軍德國外流兵有五個，前世界盃冠軍西班牙有七個，連一向少有外流兵嘅意大利都有四個，不過英格蘭係零。坦白講，英超人工高福利好，踢一兩場好波，英國傳媒就捧到佢哋上天，要英格蘭球員外闖，真係好難。艾殊利高爾肯轉會去羅馬，原本都係一種挑戰，不過近期正選位置不保，林柏特、迪科爾等生涯尾聲走去掘美金， 湯馬士恩斯上季幾乎學老爸去國際米蘭，但交易不了了之，否則就有當打英兵外闖。
正所謂知己知彼，英格蘭欠頂級外流兵，對德國、西班牙等新興踢法陌生，國家隊自然蝕底，淪為歐洲二線，甚至三線兵都係自找；破釜沉舟講句，英超應該放寬所有外援條例，甚至限制本土球員人工增長，逼佢哋分散不同國家聯賽，英格蘭先有進步機會。
文：牽牛