左丁山上星期到曼谷渡周末，如常住在四季酒店，此店已經改名，現在叫做Anantara Siam Bangkok，名字比較翹口，坐的士稱之為Four Seasons（泰式發音類似「科時新」），司機更加明白，情況就好似在九龍上的士去「麗晶」，司機一樣識車你去「洲際」一樣。
在香港每日會俾鬧鐘嘈醒，趕喉趕命，到咗「四季」就唔同，大床十分舒服，枕頭又軟，兼冇鬧鐘大鳴，星期一早上一覺醒來，已是八點幾，打開電視機睇BBC，不停播出李光耀逝世新聞，方知新加坡國父已於2015年3月23日早上3時18分逝世，以八字計就係乙未年己卯月戊戌日甲寅時，八柱係四土四木，土尅水、木洩水、水命之人、遇此八字，少不免要避之則吉；而李光耀生於1923年9月16日，就是癸亥年辛酉月壬辰日，水命也，加上已經過咗九十歲生辰，老人不復當年勇，再染上肺炎，碰上如此時辰八字（四木四土），上天堂與愛妻重逢，似有定數。
八卦講完，李光耀逝世，令人頓生感慨，李因一世梟雄也，可與曹操、毛澤東、鄧小平比一比政治權謀、及鎮壓對手，亦可與唐太宗、康熙比一比治國興邦之道。
尼克遜曾讚譽佢係小島巨人，若換轉時空地域，會係另一位邱吉爾、迪斯拉利（Disraeli）、Gladstone。
但李光耀生在新加坡，與愛人一同在劍橋大學讀法律，一級榮譽畢業，在1950年代，返回新加坡做律師幾乎一定發達，佢就與阿哥李金耀創辦律師樓（Lee & Lee。至今仍然係新加坡最有地位，最有影響力之律師樓），後來做工會法律顧問，繼而自己參加埋工運，從政，推動新加坡自治至到完全脫離英國獨立，當時只不過三十幾歲，可知英雄出少年，若非因為有二次大戰，日軍佔領新加坡，佢十九歲就已經讀完劍橋，不必等到1949年26歲先至畢業。
呢位徹頭徹尾英式精英教育產品經歷過日軍侵略亂咁殺人年代，好明白英式民主遊戲與東方獨裁鎮壓手段，得兩方之精要，故此成為一個百分之一千嘅實用實利主義者，以一人一票民主方式爭得上台權位，以東方權謀劈低對手（李光耀金句之一："Nobody doubts that if you take me on, I will put on knuckle dusters and catch you in a cul-de sac"），正是遇神殺神，見魔殺魔，將個人魅力與兇惡融合，令反對派聞風喪膽。
香港咁多人留學劍橋，點解出唔到一位李光耀？