嘉里物流計劃將嘉里貨倉改建成骨灰龕大樓，落成後更讓後人用手機遙距拜祭先人。總裁馬榮楷噚日話呀，如順利改建，龕場將於2019年營運，如後人事忙，無法喺清明重陽拜祭先人，可以透過智能手機接駁龕位前嘅攝影機拜祭，毋須親身到場。佢又話嘉里貨倉位於柴灣工業區，位置偏僻，相信對社區影響唔大，估計政府今年5月審批，一旦獲批改建，唔排除會先推出「示範單位」，畀更多人認識呢項服務。
嘉里物流計劃想將貨倉改建為15層高嘅骨灰龕大樓，提供12萬個龕位。如果以現時私營龕位售價約為數萬至廿多萬元計，項目預計可為公司帶來100億元收益。若改建計劃「闖關」不成，馬榮楷話公司唔會再覓地重推。