立法會噚日辯論由自由黨方剛提出嘅「平衡旅遊業對香港經濟和市民影響」嘅議案，呢個話題近期最熱，議員個個爭住提修正案表態，結果足足有多達11項修訂，原議案被掛到好似棵聖誕樹咁，但最終連同原議案在內全被否決。
投票期間，八方聽聞發生咗段小插曲。有議員同八方講，新民黨葉劉淑儀見到自由黨田北俊，即拉住對方呻，話叫咗田少嘅細佬，即係新民黨副主席田北辰要留低投票，但對方一於少理。
八方睇返投票紀錄，二少投晒咁多項修正案，直到最後一項由葉太提出嘅修正案，佢偏偏冇留喺議事廳投票，難怪葉太咁嘮嘈，目擊嘅議員話佢當時都幾大聲吓，惹人側目。