大昌行集團（1828）乘住網購當頭起嘅大趨勢，推出電子商貿平台，單係大昌行個brand，同埋大孖沙嘅股東，已經有晒憧憬，而家陣集團仲潛喺三年海底價，抵博。
推電貿平台惹憧憬
大昌行推出電貿平台嘅大昌優品，主攻祖國零售市場。諗到嘅係，大昌行既有傳統線下零售網絡，而本身優質品牌有超過60年經驗，加埋喺祖國超強物流倉儲優勢，已經有得fight。
啱啱喺今年頭，大昌行再收購電器分銷商太平洋行70%權益，成為咗喺祖國拓展家電業務基石。呢壇製作，相信亦係為大昌行進一步強化整體零售瓣數嘅動作。再講，大昌行阿媽係超級大孖沙中信（267），有超強嘅背景，大昌行絕對有潛力遲來先上岸。
再睇祖國網購嘅情況，單喺去年，祖國網購規模，高達2.8萬億元人仔，數額十分驚人，又根據調查機構麥肯錫，為6,183名互聯網用戶進行消費調查，發現食品網購增長迅速，平均每年購買常溫同生鮮食品次數，去到34次，而用戶當中，有四成曾經進行食品網購。大昌行食住呢個大勢，有得發圍。
場內評估，主要集中喺大昌行汽車分銷瓣數，大昌行股價越質越低，三年跌咗58%，現價（3.74元）潛喺三年底，市值得番69億元，PB得0.75倍。就算以汽車分銷代理瓣數去睇，行家中升（881）家陣上1倍PB、永達（3669）講緊1.4倍，大昌行都平咗成截。
咪忘記上邊講嘅大昌行電子商貿平台，一搞掂嘅話潛在增值同爆炸力，就完全唔同睇法。而市場家陣畀到英國食品網購商Ocado嘅PB係高達10倍！趁股價喺微時，一於煲大昌行，當追番到行家上中升PB水位，講緊要升近37%，到5.1元。
錢雋
細價股專家
本欄逢周二、三、五刊出