前日出版嘅《東周刊》訪問咗禮賓府前總廚鍾建良，佢爆特首梁振英夫婦吩咐佢要稱呼傳昕、齊昕同頌昕做「大少」同「小姐」。
前日八方有向特首辦查詢鍾師傅講嘢係咪堅㗎？但一直冇回覆，特首辦就延至噚日發新聞稿，先指鍾建良前年離開禮賓府時，職位只係二級家務員、喺禮賓府廚房做嘢，但並非總廚；繼而針對「大少」同「小姐」嘅稱號澄清：「行政長官和夫人從來沒有這樣要求。」仲話搬入禮賓府前，梁家外傭只係叫三兄妹個名，但冇講搬入禮賓府後叫法有冇唔同呢？
八方噚日打去問鍾師傅，佢透過發言人澄清有關稱呼只係當時禮賓府員工對CY仔女嘅稱謂，唔係由CY夫婦直接吩咐，強調接受訪問目的唔係揭秘，而係令大家回味香江嘅經典美食。此外，特首辦回覆立法會財委會時指，CY自去年4月至今年2月，只係喺粉嶺嘅特首別墅進行過一項公務活動，但別墅嘅管理開支就需要76萬元。