雖然今個星期係國際賽期，但幾支英超勁旅都有新聞，英國《太陽報》同《地鐵報》日前就話曼聯、車路士同利物浦都計劃緊季尾大清洗，送走冗員！迪馬利亞、菲臘路爾斯、巴洛迪利呢啲今季先加盟嘅球星，都有機會喺今夏流入轉會市場。
天使心淡想去PSG
雖然迪馬利亞喺「雙紅會」中後備入替，送咗球靚助攻畀桑馬達，幫曼聯作客贏波，但《太陽報》披露，紅魔主帥雲高爾賽後依然好唔滿意今季先以破英超轉會費紀錄加盟嘅迪馬利亞，仲鬧到佢暈，搞到「天使」心情低落。佢喺英國嘅生活都唔多順利，前排間屋俾人打劫，嚇到佢老婆即刻搬去酒店。之前英國傳媒都報過，話曼聯打算趁迪馬利亞仲有價有市，想將佢賣到巴黎聖日耳門，或者用佢換卡雲尼返嚟。如果話迪馬利亞走唔走都仲有懸念，咁法卡奧被清走就係九成九嘅事。
曼聯今季由摩納哥借法卡奧返嚟，大嗱嗱都使咗過千萬鎊租借費，但完全貨不對辦。近期雲高爾寧願搵朗尼打單箭頭，都唔畀法卡奧正選，仲叫佢踢預備組，睇嚟曼聯買斷佢嘅機會極低。法卡奧都打定輸數，「明顯我要搵一間會畀我穩定上陣機會嘅球會，任何足球員都需要比賽。我會為曼聯全力以赴，仲有八場英超，咩事都可能發生。當賽季完結，我就會冷靜諗吓下一步。」另外，成功由曼聯清洗名單變成核心主力嘅艾舒利楊格對敵對球迷一樣咁好，佢前排同個曼城球迷自拍，但整爛咗人哋部電話，楊格就出錢幫球迷整番好部電話。
講到清洗前鋒，冇乜邊隊夠利物浦狠，《地鐵報》指紅軍想一次過送走三大前鋒，包括兩個「新兵」巴洛迪利同列基林拔，仲有波連尼。佢哋今季聯賽加埋上陣四十三次，但入得四球，效率真係幾低。我求大俠唔擔心林拔同埋波連尼，佢哋人工唔高，大把中下游球隊想要。最擔心嘅都係巴神，佢人工同轉會費都咁高，個人又麻煩，都唔知邊隊肯接收佢。
車仔棄將最有質素
車路士清嗰啲就幾有質素，例如捷克門將施治，據報任何球隊拎一千萬鎊（約一億二千萬港元）嚟都可以買走佢！上季為馬體會打入歐聯決賽嘅菲臘路爾斯，嚟到車仔後被投閒置散，而車仔標價一千六百萬鎊掛牌，希望佢搵到戶好人家啦！
識睇，一定係睇足英台【英波Live】：
http://soccer.appledaily.com
http://bit.ly/engballlive