冠軍騎師潘頓第三場憑「怡昌之星」贏夠本身從騎在港500win，第四場因座騎「競駿高飛」臨時退出而做觀眾。到了第五場二班一哩，他一落番場即刻又贏，方廐「準備就緒」與潘頓故劍重逢，結果1.9倍全熱門順利後上掄元，潘頓在港頭馬增至501場，再創新高。
「準備就緒」累積五戰泥地全勝未輸過，早排敗走草地打吡大賽，杜拜世界盃又不入選去唔成，最終贏番場泥地補數，跑出1分37秒39泥地一哩全港紀錄時間，舊紀錄是2004年5月16日「包裝福星」之1分37秒40，「準備就緒」服役生涯共取六冠三位，下季隨時再向杜拜打主意。
「準備就緒」上仗仲係柏寶騎緊，呢次佢寧願揀久休復出之蔡廐馬「如我所願」，都唔再騎前駒，跑落「如我所願」居然包尾，反為蔡廐另一駒「川河猛駒」跑番泥地好生猛，只係影相輸短馬頭做二奶，累積兩戰泥地百分百上名，至於三、四名分別係初跑泥地一哩之「飛龍駒」，以及方廐另一駒「雲呢拿」。