以前嘅勵志故事，係李嘉誠靠串膠花，白手興家建立一個商業王國；而家嘅勵志故事，係你捱麵包成功上車：因阿媽改嫁成功完成機師夢。呢類所謂勵志故事，講到尾就係社會有病。花旗最近出嘅千萬富翁調查，指目前香港有5.6萬個千萬富翁，平均58歲，而佢哋賺第一個100萬嘅平均年齡係33歲。睇番25年前，即約1990年發生咩事。當時生活指數低好多，麥當勞一個餐10蚊左右，一串魚蛋1蚊有找，樓價更加唔使講，120萬買到一層700幾呎藍田匯景花園單位。只要你喺80年代經濟起飛時努力打工儲錢，仍有能力買到唔錯嘅單位，如進行投資做生意，捱去到33歲賺第一桶金。坐穩後，就安然踏入由90年開始嘅樓市泡沫起點。
我唔知呢班千萬富翁係點由100萬變1,000萬元，但90年代即使係搞實業，相信有唔少人有沾手炒樓先可以致富。所謂時勢做英雄，由捱出頭起家，加上投資眼光，再靠炒賣滾大身家，呢條發達之路，以前係好work，但今日一般打工仔，或經營小生意嘅人，喺高昂租金下生存已好辛苦，要儲第一桶金難上加難。只係時代越來越少可以讓一班腳踏實地嘅人，喺香港捱出頭嘅機會。後生仔要向上流動，一係靠炒賣投資，一係靠創新然後放眼世界，但兩者都講求早起步。
Fifi
http://www.facebook.com/lovefrystock
本欄逢周二、四刊出