王維基旗下香港電視（1137）舊年宣佈以OTT形式播電視，起初勢頭真係唔錯，頭幾日仲搞到網絡大塞車，可惜熱情過後，收視開始每況愈下，又唔同藝人續約，即使近日播緊套《導火新聞線》幾有迴響，但都唔覺佢哋有乘勝追擊嘅動作，唔怪得對手電視廣播（TVB，511）高層都忍唔住暗寸佢哋。
話說TVB噚日公佈，明年1月推出全新OTT平台，用戶只需透過機頂盒或手機，就可以接駁電視機收看節目，簡單啲講，同港視做緊嘅冇分別。佢哋嘅新任執行董事鄭善強（SK）就話，TVB嘅OTT平台係開放平台，歡迎任何內容供應商同佢哋商談合作，加入免費或收費平台內容。
咁歡唔歡迎港視節目喺TVB平台播先？SK話，唔會抹煞任何可能性，但佢哋嘅服務明年開始，唔知到時港視仲有冇內容供應喎！