喺佐敦經營55年嘅新樂海鮮酒家噚日下午正式結業，唔少熟客再去幫襯兼緬懷一番，當中包括商台首席智囊陳志雲。
陳志雲噚日早上大約十一點跟同事一齊到新樂，原來佢小學二、三年級開始已經跟家人去新樂飲茶，佢憶述：「有一次經過，好似係呢間（新樂），寫住有人腿飯食，嚇咗我一跳，原來係火字冇咗兩點」！佢又自爆，細細個已經識得呃魚翅食，「細個好鍾意食魚翅，一想食魚翅就會同屋企人講唔舒服，佢哋就知道要整碗魚翅我食，新樂係我其中一個扭計嘅地方」。
至於新樂咁多款點心，陳志雲就最鍾意食蝦餃，佢話「呢度啲蝦餃好好食，蝦係越南蝦，𠵱家冇乜舖頭用，鮮味又爽口，蝦餃睇落唔係好大隻，但係啲蝦差唔多填滿每個（蝦餃）空間」。
陳志雲連一粒蝦餃都可以形容到既立體又美味，新樂將來重整旗鼓，一定要搵佢幫手宣傳先得。陳志雲亦希望新樂快啲搵到地方繼續經營，新樂掌舵人「任哥」莫大任就話，仲周圍搵緊舖，新店將會改名為「新新酒家」。
