早前有消息指滙豐控股（005）因成本上升與資本要求增加，本港滙豐與恒生銀行（011）約200名高層今年大部份要凍薪，只有極少數人可以獲得微調。睇番恒生最新公佈2014年年報，一姐李慧敏舊年總薪酬有6%升幅，全年袋2,063萬元，即使佢今年要凍薪，應該都唔會投訴啩。
恒生舊年實際純利只算持平，一姐李慧敏嘅總薪酬有得加，其實都算唔錯；佢主要係基本薪酬與實物收益增加，花紅部份，無論係現金與股份報酬都係減少咗嘅。而另一位經常講解人民幣走勢、滙率市場嘅恒生執行董事馮孝忠，舊年總薪酬亦有得加7%，袋走820萬元㗎。