呢期香港嘅具爭議問題，例如調整一簽多行同擴建第三條跑道，唔多唔少都關深圳事，同樣辣㷫咗深圳市政府。有政界口痕友有個觀察幾有趣，佢話一簽多行問題上，深圳市政府偶爾會有《環球時報》等官媒做代言人，幫佢哋鬧吓香港，而喺三跑爭議上，深圳原來都有位代言人，發炮威力不下於官媒。
到底邊個咁巴閉幫深圳發聲？呢位口痕友反問花生友，觀乎民建聯成員、前民航處處長林光宇嘅言論，你覺得佢企喺邊一邊？花生友睇番紀錄，林光宇去年底開始高調反三跑，近期更同運輸及房屋局局長張炳良隔空擦出火花，強調香港同內地機場嘅談判「有等於冇」，公然同特區唱反調。
「三林」混戰
花生友好奇問呢位口痕友，愛之深咪責之切囉，前處長唔可以持不同意見咩？口痕友話咁樣諗當然可以，但此舉無疑係同暗地反對開放空域嘅深圳市站在同一陣線，查實林光宇2007年起獲委任為中國南方航空獨立非執行董事，2010年辭任，唔知係咪因為呢個背景，惹人遐想？
咁點解另一位前處長樂鞏南都反對？呢位口痕友說不出所以然，反覆重申呢一場仗，深圳市嘅發功好勁，難怪機管局行政總裁林天福連日披甲上陣解畫，仲笑言今次係「三林大戰」，除咗林光宇同林天福，仲有前天文台台長林超英加入混戰反三跑，三林中又以林超英最有公信力，對輿論最具影響力。
花生友