區議會選舉年尾舉行，今年工黨打算派12人迎戰，噚日晒冷同傳媒會面，今屆集中沙田、大埔、荃灣、元朗、九龍城、東區六區出征，主要對手係建制派嘅「老屎忽」。42歲嘅工黨副主席譚駿賢話，有意喺自細長大嘅屯門友愛北出戰，因為現任區議員民建聯陳雲生喺佢細個讀緊書時已經做緊區議員，希望擊敗佢創番新氣象。
趙恩來則有意喺荃灣愉景選區挑戰佢前老細新民黨立法會議員田北辰、葉榮將會喺沙田撼民建聯立法會議員葛珮帆。而落戶西灣河嘅曾國輝同九龍城嘅趙仕信，會同資源雄厚嘅工聯會同西九新動力一較高下。
熟悉機場三跑、希望提高深井居民對三跑害處認知嘅夏希諾，則會喺荃灣深井新區試腳，據聞新民黨以及與新民黨反咗面嘅鄭承隆，都有興趣落場，呢場仗似乎幾精采。