新民黨主席葉劉淑儀由上屆特首選舉攞唔夠提名入閘之後，一直磨拳擦掌部署2017年再戰。噚日喺特首梁振英恫嚇港人唔排除競逐連任之際，葉劉則出席「瑞士瑞信」主辦嘅亞洲投資會議，以〈在政治不穩定局面下香港的未來〉為題演講。
係人都知人大8.31框架下，出唔出到閘都係阿爺話事，葉太發言則幫阿爺講好說話，話2017年普選特首嘅承諾係北京畀香港人嘅大禮，仲引述美國學者話呀，8.31係「有限提名的普及選舉」模式，之後仲大談管治遠景，話香港領導人喺經濟上要帶領香港減低對地產及低增值旅遊嘅依賴，加強同中國以至世界合作等；政治方面呢，政府則要掌握點同政黨交流合作等等喎。聽落好鬼似競選政綱，似乎佢都熱定身等出閘咯。