融創（1918）董事長孫宏斌噚日喺業績會完美演繹何謂霸氣，除咗開腔大罵佳兆業（1638）債權人同埋九倉（004）谷到面都紅晒，連負責主持業績會嘅公關公司入面嘅公關都唔放過，破口大罵對方岔亂歌柄，最後仲將佢趕出會議室，搞到場面十分尷尬。
話說孫宏斌越鬧越火爆，搞到業績會超晒時，一向負責幫客仔解圍嘅公關，就諗住好心打圓場喇，點知孫宏斌唔領情，仲鬧番佢轉頭：「你別打住，人家還未說完，你下去，下去！」見到客仔咁火爆，呢位公關惟有認衰答佢「行行行行行……」，之後就默默步出會場，避一避風頭。
趕走公關之後，孫宏斌嘅腎上腺素可能未降得切，仲好大聲咁同記者講：「你再繼續！」
呢股懾人氣場嚇到發問嘅記者都窒咗兩秒，先夠膽繼續再問問題。