前星期，營銷主管靚女W請左丁山吃午飯，約會之時，剛好報紙刊出不記得甚麼機構選出嘅亞洲五十間最佳餐廳，香港佔了九間，細看之下，間間都去過，其中八間吃西菜嘅都好難訂位，第九間就係位於九如坊嘅大班樓，訂位較為容易，於是大家就去咗大班樓。
坐低無耐，抬頭周圍望下，發覺閣樓三十幾名食客之中，陰盛陽衰，連左丁山在內，男士唔夠半打，於是特登問靚女W：「點解呢度咁少男人嘅呢？」W佻皮咁回答：「男士鍾意食快餐啩！」此非特別現象，以前置地廣場賀菊未裝修前，呢間日本料理中午食客又係女多男少嘅。左丁山一個非科學性結論就係，中環白領之中，賺錢能力比較強嘅人士，以女性較多，在街上做擔擔抬抬嘅，幾乎全部係男仔。
呢日一班大學中人坐埋一齊，與高官對話，唔知點解，有人講到香港男女平等問題，大家一致認為在亞洲地區，香港女士有極大機會，性別歧視問題並不存在，好似美國咁，還要講男女同職同酬，簡直匪夷所思。
一位醫學院教授於醫學院學生之中，因女生佔六成以上，女醫生人數在未來十年會不斷增加，入學面試時，故意問一位女學生：「社會以女醫生為主，會唔會產生問題？」你估女生點答？女生立即講：「教授此言帶有性別歧視成份。」嚇到嗰位男教授立即道歉，改問其他。
女生如此直率，乃通識教育之功也，現在DSE畢業學生，比過往A Level考生，據講更加大膽敢言，更勇於批判，但學科認識較少，例如工學院學生冇在DSE修讀延伸數學，入到大學碰上微積分就零舍讀得辛苦。高官話一個有趣嘅現象係日本究竟男人大還是女人惡？表面上，日本男人佔盡高級職位，白領女職員在辦公室經常為男人斟茶遞水，日本普遍似有大男人主義，男人惡晒。
但睇深一層，日本男女結婚後，公司出糧嘅現鈔糧袋，係交俾太太嘅，太太掌控家內財權，每日向丈夫發放零用錢，有個笑話係不少日本男士每日只獲太太發放一千日圓，想話使多個錢都冇，年老退休嘞，就好驚俾老婆「踢走」！如此社會，是否男女不平等呢？真難講。大學教授話DSE考生在18歲考大學，女生往往比較早熟，佔盡優勢，現在大學內已是女多男少，以後大學男女比例肯定更加不平衡，故此將來大班樓食客係清一色女白領，一啲都唔奇。