八方細細個就知，講粗口係唔啱、唔禮貌嘅行為，但今時今日，講粗口已經變成一種文化，但講粗口講到俾人告，你都咪話唔無謂，噚日喺東區法院就有一單。話說調理農務蘭花系成員盧建民，舊年六四25周年嗰日，喺北角金殿大廈外，同喺度「集會」嘅愛港之聲成員互罵，盧不停爆粗，最後被票控公眾地方行為不檢，控方話警方當日喺一個鐘內警告咗佢4次冇聽先至拉人。
案件原本噚日開審，但控方庭上同意不提證供起訴，畀佢自簽2,000蚊，守行為年半了事，但唔准佢再干擾或企圖干擾社會秩序、對任何人或威脅對任何人行使武力、作出喧嘩或有意圖激使他人破壞社會安寧。