信置（083）老闆黃志祥嘅三位公子黃永光（Daryl）、黃永龍（David）與黃永耀（Alex）已經先後加入公司，36歲嘅Daryl做咗12年，最細嘅Alex都做咗成年。噚日一講到三兄弟之間點樣分工，Daryl與David就好似夾好咁話，互相向對方學嘢！
Daryl透露，三兄弟喺公司係坐埋同一間房工作，仲講笑咁話，大家可以一齊分餅乾食。佢話，自己一早入信置幫手，等咗十年，好開心終於見到兩位細佬都陸續加入，亦可以從佢哋身上學到後生仔嘅嘢，例如facebook，佢都係舊年先識用兼開戶。
佢細佬David今年26歲，加入信置三年左右，佢喺美國哥倫比亞大學修讀歷史，問佢喺公司有冇負責邊個範疇，佢就話一路跟住哥哥學嘢，說話謙虛有禮。