喺香港做練馬師可以好風光，例如大摩獎金月入往往過百萬，贏咗大賽馬主亦可能有重賞；而練馬師可以自己落注，按理贏馬多，贏錢機會亦越大。但同樣係外籍廐主，孫達志以往喺德國係名牌練馬師，但嚟香港發展之後，近年越玩越縮，2009至2010馬季已試過成績唔達標，今季暫時得6 Win，上岸遙遙無期，1月4日勝出「麟轉乾坤」後食白果至今。而3月份更慘，冇馬上過名，只有「甜蜜蜜」、「好球」等駒共四次跑入四、五名，你估佢今個月獎金收入有幾多？大概係5,300蚊，洗碗一定多過佢，就算馬會有宿舍，都可能入不敷支。
咁嘅環境下，老孫嘅馬梗有鬥志，今期（25日）夜賽佢就有機會略為翻身，頭場「麟轉乾坤」又上陣，隻馬今季演出好穩定，雖然泥地冇根據，但要拼入位置攞啲獎金，唔係太困難。至於尾場「優勝」更係主要爭勝分子，季內泥地曾以驚人後勁取勝，力壓實力亦好強嘅「威勢之寶」；而上仗檔位欠佳，都一樣力拼入Q，可見泥地性能超卓，今次7檔適中，睇嚟老孫可以一洗頹風啩！