南韓泳壇明星朴泰桓因為被驗出服食禁藥，禮拜一俾國際泳聯（FINA）罰停賽十八個月，如果南韓奧委會唔放過佢，再罰多三年，佢就要同明年夏天嘅里約熱內盧奧運講拜拜嘞！
接力銅牌或益咗香港
現年二十五歲嘅朴泰桓喺舊年九月一次抽樣藥檢中「肥佬」，事後佢將責任推畀醫院，話係喺仁川亞運前兩個月去進行脊椎治療嗰陣，醫生打錯針所致，而且仲採取咗法律行動。但佢藥檢肥佬係鐵一般嘅事實，所以FINA經過聽證會後，禮拜一判朴泰桓停賽十八個月，停賽期由舊年九月三號開始，直到下年三月二號為止，肯定錯過今年七月二十四號至八月九號喺俄羅斯喀山舉行嘅世界游泳錦標賽；而佢喺停賽令生效後攞到嘅成績同獎金會全部被褫奪，當中包括喺仁川亞運攞到嘅六面獎牌。
外界原先估FINA會罰朴泰桓停兩年至四年，家陣只係判十八個月，算係手下留情。FINA行政總監馬古拿斯古話：「朴泰桓唔會去喀山參加世錦賽，但就應該可以喺二○一六年去里約熱內盧參戰奧運。」朴泰桓可以喺二十一日內提出上訴，但南韓傳媒同埋馬古拿斯古都認為，朴泰桓唔會向體育仲裁法庭提出上訴。
喺奧運會攞咗四面獎牌嘅朴泰桓，原則上趕得切玩明年嘅里約熱內盧奧運，但係就要南韓奧委會肯放佢一馬至得；事關南韓奧委會舊年改咗例，任何因藥檢肥佬而被罰停賽嘅運動員，刑滿之後有可能喺三年之內都唔可以代表國家出賽。南韓奧委會代表咁講：「如果引用呢條條例，朴泰桓就唔可能參加下年嘅奧運會。」如果朴泰桓限期內唔上訴，佢代表南韓獲得4x100米自由泳接力嘅銅牌，就會由當時得第四嘅港隊（吳鎮男、謝旻樹、黃竟豪同張健達）頂上。