特首梁振英周日喺禮賓府同建制派會面時，點名批評公民黨毛孟靜帶頭拉篋反對內地客，Miss Mo噚日同香港本土另一成員范國威齊齊拉篋開記者會（圖），再次批評梁振英抹黑。
Miss Mo話呀，啱啱過咗嘅星期日，佢原本喺度閉關寫緊書，準備為暑假嘅書展出擊，交稿死線係本月底，點知梁振英針對佢嘅抹黑言論一出，搞到佢成個彈起，傳媒電話一個接一個，前後一共收到超過十個，令原本計劃寫八篇文嘅佢，最後只寫咗五篇。
Miss Mo仲話，講到拖篋嘅始作俑者，范國威先至係，因為范國威2012年已經將拖篋呢種行為藝術喺立法會率先表演，抗議政府無視北區居民慘受水貨客同內地自由行遊客過多之苦。聽日係特首答問大會，兩人會否再拖篋？Miss Mo話考慮吓。