梁特早前將成立創新及科技局嘅決議案硬闖立法會，獲優先表決卻敗陣收場。為創科局推倒重來而成立嘅立法會小組委員會噚日開會，由經民聯盧偉國（圖）做主席，點知政府再次失威，成份文件收回，會議前後只有45分鐘，盧偉國可能係立法會史上最短命主席。
查實政府係想將原本未能表決嘅決議案，改一改年份，再交畀立法會財委會表決，但立法會法律事務部覺得政府做法有問題，因為原本嘅決議案因為未能表決已經算係失效，唔可以改一改年份就再交畀立法會表決，政府雖然唔同意，但就話為咗務實、省時，唔想糾纏喺法律技術問題，所以會喺預算案表決後，重新提交全新決議案畀立法會表決，並會提出廢除舊嘅決議案，泛民大讚立法會法律事務部幫市民把關，唔畀政府亂嚟。