英格蘭國家隊呢幾年成績麻麻，英足總為咗振興國家隊，周一宣佈多項新政策，喺下季起逐步生效。例如收緊非歐盟球員申請勞工證嘅門檻，由以前排世界前七十位嘅國腳都可以申請，收緊到前五十位先可以。以前有啲外籍球員十八歲加盟英格蘭球會，踢三年後都可以當做自己球會青訓，下季就改例至十五歲；同埋球隊註冊廿五人名單時，至少要有十二人嚟自英格蘭青訓。如果有球隊下季想斟FC東京嘅武藤嘉紀（圖）、金英權呢啲日韓國腳，基本上諗都唔使諗，好大機會申請唔到工作證。不過，我求大俠覺得上有政策、下有對策，以前阿仙奴同車路士會喺世界各地簽啲十六、七歲小將返嚟培養，下季就可能轉簽啲十四、五歲！
識睇，一定係睇足英台【英波Live】：
http://soccer.appledaily.com
http://bit.ly/engballlive