最近好多老師同社工都好鼓勵啲家長帶埋仔女去睇陳木勝監製、關信輝導演，楊千嬅、古天樂同五個小朋友演出嘅電影《五個小孩的校長》，因為部戲真係好勵志感人。上咗五日，截至前日票房約有六百三十萬，成績好好，相信有望破千萬，所以前晚寰宇公司喺銅鑼灣舉行慶功宴。
古仔讚小演員生性
睇過部戲嘅觀眾都話千嬅演嘅校長好出色，噚日佢受訪話：「大家對我有咁好評價真係好開心，但我都要感激五個小朋友同古仔喺戲入面畀到火花我先會令我入戲更深。」千嬅之前去咗內地九個城市四十九間戲院宣傳呢部戲，跟住會去馬來西亞同台灣宣傳，問千嬅會唔會好掛住仔仔？佢話：「唔會呀，可以faceTime見到，𠵱家都大個啦，媽咪幫手睇住，唔會擔心。」
古仔作為呢部戲嘅投資者之一，部戲叫好叫座，佢當然開心，古仔話：「好開心見到班小朋友生性，有個病咗冇嚟，今次戲內每個角色都好盡力，特別係小朋友。」太陽娛樂老闆周焯華都有嚟慶功，仲俾人捉上台講嘢，但佢就尷尬話：「多謝啦，唔使啦。」之後仲問寰宇老闆林小明：「我走得未呀?」一講完就匆匆落台。
撰文：馮仁昭