地產商牽頭喺落馬洲起購物城，恨死唔少隔籬，有北區區議員噚日約埋幾位議員同官員去沙頭角禁區行吓，力sell沙頭角進一步解禁，畀機會卿姐唔使回鄉證都可以踩過界！
噚日個沙頭角半日團，由大輝吹雞，民記北區區議員帶路。正式視察前，警察提醒大家中英街入面有八嚿界石，以北係內地，以南係香港，好容易會踩過界，卿姐即問：「我過咗又點呢？」引得大家哈哈大笑，嫻姐回話：「咁咪唔使攞回鄉證都入到去囉。」卿姐後尾又不時叫大輝帶自己入境，「你係政協吖嘛」，但大輝耍手擰頭話：「我唔擔保㗎。」
成棚人入到中英街，好多人唔覺意就踩過界。卿姐話其實幾年前都去過中英街，冇話特別感觸，自己當然想去內地，只係𠵱家冇呢個自由，咁今次有冇踩過界？「唔知呀，佢哋話有囉！」