惠理（806）推出價值A股ETF（3095）噚日掛牌，身兼老闆兼主席嘅「股壇金手指」謝清海喺上市儀式，拖住一位靚女合照，呢位靚女正是謝清海太太杜巧賢（Eva）。
謝太見報率甚低，不過金融界人士好多都識佢，因為謝清海去親大場合都拖住老婆一齊去，連新股嘅投資者推介會、投行舉辦嘅投資者會議，都會見到佢哋出相入對。
咪以為謝太都係做金融出身，查實Eva係做政務主任（AO）出身，1999年離任前，做到房屋局首席助理局長，喺官場屬少數智慧與美貌並重嘅AO。
佢1994年下嫁謝清海時，正係惠理基金成立一周年左右。婚後五年，Eva辭官專心相夫教子，但亦冇蹺埋手做師奶。除咗陪老公出席金融界活動，近年佢仲開辦一間專門照顧患有自閉症小朋友嘅學校。