早排有傳伊斯蘭國（IS）殺入香港招攬支持者，嚇親唔少政圈中人，大家都唔希望恐怖分子搞香港，更加唔想有人無厘頭辣㷫佢哋！
一向以勇猛見稱嘅民建聯蔣麗芸似乎冇有怕，噚日佢係facebook留言，引述早前也門清真寺被炸，伊斯蘭國承認責任嘅新聞，自問自答：「為甚麼伊斯蘭國連自己崇拜的寺廟也要炸？無它，同一宗教內亦分不同族群；族群內亦分不同派別，今次事件就是派別之爭的結果。」之後隨即拎呢件事抽泛民水，話27名泛民議員就分10個派別之多，一有意見不合，「一樣拼個你死我活」。有泛民中人覺得，將泛民比作伊斯蘭國已經唔恰當，仲要將泛民內爭拗比作恐襲，完全離晒題。