雨傘運動帶出抗爭路線分歧以至世代之爭，港大政治及公共行政學會噚日以此為題舉行論壇，有台下學生談及近日退聯風波，講者之一嘅學民思潮黃之鋒話尊重選舉結果，時事評論員李怡就話，查實退聯呢件事，可以令學聯有機會檢討以建設民主中國嘅綱領，係咪仍然符合學生嘅想法？指有啲學生似乎認為建設民主香港更好喎。
李怡同時話，年長嘅人有生活經驗，呢點係強項亦係弱點，因為會認定不可為嘅事就唔會去做，相反年輕人不在乎成果，認為啱嘅、合乎公義就去做，舉例話如果一個城市嘅青年畢業後只想賺幾多錢、幾耐供完樓、任由不公義發生，以人大定下八三一框架為例，以為改變唔到就接受，「個個都咁諗個城市就敲響喪鐘」，強調雨傘運動後特別相信年輕人。