韋英雄繼續勁，雷霆又贏一場！雷霆控衞韋斯卜克（Russell Westbrook）近排攞「三雙」真係停唔到手咁滯，周日主場對熱火就收穫個人今季第十次「三雙」，帶領球隊以93:75贏波，個西岸第八位越嚟越穩陣。
自從二月攞咗明星賽MVP之後，韋英雄真係上晒身，周日就喺近十三場入面第八次交出MVP級嘅「三雙」數據，為雷霆貢獻十二分、十七次助攻同十個籃板。原來今場已經係韋英雄個人今季第十次攞到「三雙」，係繼七季前嘅一代「三雙王」傑特（Jason Kidd）之後，第一個單季造出雙位數「三雙」嘅球員。不過，呢位全能控衞當然唔只進攻勁，防守都有一手。熱火後衞獲迪（Dwyane Wade）呢期都狀態大勇，但今場就俾韋英雄守到一戙都冇，只係入到十二分，係成個三月表現最差嘅一場。
唔擦AI鞋：「細個冇睇波」
講起一個人孭起成隊波，76人「戰神」艾華遜（Allen Iverson）都算係元祖級嘞。AI早幾日就盛讚韋英雄，仲自稱係佢嘅頭號粉絲㖭。周日賽後有記者提起呢件事，韋英雄就好例牌咁話感到榮幸，但記者追問佢係咪睇AI打波大，一向鍾意同傳媒玩嘢嘅韋英雄竟然答：「吓，我細個冇追開籃球㗎喎，老老實實。」連對住傳媒寸寸貢嘅態度都咁似，唔怪之得AI咁睇好佢啦。
雷霆𠵱家以四十勝三十負穩守西岸第八，領先海鮮波嘅太陽兩場半同殘陣嘅塘鵝三場，只要韋英雄保持水準，呢張季後賽入場券應該實食冇黐牙啦。