香港有唔少「愛國愛港」嘅社團分佈各區，每逢政改諮詢，都會交幾萬份一式一樣嘅意見書，幫政府製造民意。喺人大委員長張德江呼籲建制派發聲、特首梁振英需要自己友發出和音之際，噚日又有名為「香港廣州社團總會」嘅新組織成立，梁特都畀面出席！
而呢個新社團，由霍家負責揸旗，會長由霍震寰出任，佢阿哥霍震霆、以及霍震霆嘅兩名公子啟剛同啟山都各有職務，可見霍家身負重任，一班永遠名譽會長就係熟口熟面嘅人大同政協，包括范徐麗泰同林建岳等。中聯辦副主任林武致辭時講得好白，話成立社團其中一個重點，係為支持香港依法推動普選同壯大愛國勢力作貢獻；另一個冇講嘅重點，怕且係要喺明年立法會選舉動員鄉親票嘞。