近排花生友約見泛民中人時，都會陰陰嘴笑住問佢哋一個問題：「一億夠唔夠你使？」好多泛民聽到呢條問題，不約而同發出會心微笑，有人衰衰哋反問：「呢個係咪阿爺開嘅價先？定係有人亂噏廿四，想動搖泛民軍心先？」
查實呢個「一億」的傳言，早前已經喺政圈流傳，好多人都當係擾亂泛民軍心嘅宣傳戰，唔少人一笑置之就算。但隨住近期越嚟越多建制派開盤，賭政改方案一定會通過機會，再次令呢個傳言被炒熱。
政界見面開場白
花生友就聽過有建制派言之鑿鑿咁話，阿爺將政改定為硬任務，即係死都要過啦，咁對佢哋嚟講，錢邊度係問題呢？用一億去換張泛民支持政改嘅票，好出奇咩？仲攤開手指話，要五個就過到嘞，五億之嘛，對阿爺嚟講濕濕碎啦。
結果呢個肯唔肯袋一億嘅問題，近期再次成為政界中人、尤其係佢哋同泛民見面時嘅「開場白」。
既然係傳言，即係講乜都得㗎啦。據聞有泛民都喺圍內自己研究，邊個議員最需要呢一億應急？心水名單都有埋，但花生友都費事披露，以免講笑講出火花。
當然唔少泛民都對呢一億嗤之以鼻，有人話，一層夠大嘅樓閒閒地都二、三千萬，一億好多咩？另有瀟灑泛民笑笑口話：「有一億就環遊世界，冇一億嘞喎，咪環遊新界囉，一樣咁happy！」唔知阿爺會唔會因為呢啲泛民「戲言」考慮「加碼」。
花生友