到底政府會唔會接納基本法委員會委員陳弘毅意見，搞番場類似「余曾辯」嘅政改辯論？雖然成數唔高，但似乎又唔係完全冇可能，所以個個政界中人都冇為此落閘，惟獨公民黨立法會議員湯家驊Ronny前日卻好「敢言」，形容政府喺舉行大型民調前舉辦電視辯論係「幼稚及無稽」，除咗向陳弘毅潑冷水，明顯亦摑咗支持有關建議甚至主動向特首梁振英下戰書嘅黨魁梁家傑一巴。
事隔一日，湯大狀卻為呢番言論向陳、梁二人道歉。佢話「幼稚及無稽」呢個用詞係過於強烈，承認「咁呢個係我錯」，又話「咁嘅辯論都係有佢嘅好處嘅」，佢同時澄清，講呢番話只係想表明，政改辯論無助政改討論，亦擔心會令社會轉移視線至辯論結果，令公眾誤以為政改問題係可以靠辯論解決啫。